KUCHING,8:
Ulah siku lelaki peranak menua nguji mai dadah bansa Methamphetamine lebih 10 kilogram ke Sarawak puntan pengudah ditan ba Padang Bilun Antarabansa Kuching (LTAK) kena 16 April tu tadi.
Ku Direktor Kastam Sarawak, Norizan Yahya, urung pukul 12 tengah hari nya, saspek ditemu ngembuan ulah ti nyelai pengudah datai ari Kuala Lumpur.
“Udah nya, saspek terus ngambi kutak ari karusel kantung sebedau beguai tama ke jamban mai kutak nya.
“Raban Unit Khas Meresa Penumpang (UKPP) Opis Kastam DiRaja Malaysia (JKDM) Sarawak ti matau pejalai lelaki nya udah meresa iya lalu tetemuka 10 kambut burak dipelaba ngundan dadah bansa Methamphetamine tauka disebut ‘ice’,” terang iya.
Ku Norizan, dadah nya dipelaba pemerat 10,136 gram ti berega manggai RM347,200.
Asil pansik tumu tetemuka sindiket ngena chara ngelalau dadah begulai enggau pemakai dalam kutak ngambi enda ditemu raban bekuasa, ku iya.
“Kes dipansik ngena Seksyen 39B Akta Dadah Berbahaya 1952 ti netapka ukum mati tauka jil seumur idup enggau dilunsin enti ditemu salah.
“Mensia mayuh dipinta meri penerang bekaul pengawa mai barang chara belalai nyengkaum segerit, ai bisa, merechun, dadah enggau entukar dikena mantu raban bekuasa munas penyalah ti ngeruga pengelikun sereta ekonomi menua.
“Sebarang penerang ulih diberi nengah Talian Bebas Tol Kastam 1-800-88-8855 lalu identiti sida ti meri penerang deka diresia,” terang iya baru.